ТУТКАН ХОЛУ ШЕВЕР, КЫЛГАН ИЖИ КААС-ЧАРАШ
Улуг-Хем кожууннуң Шагаан-Арыг хоорайда Музейный деп доора турар кудумчуда 11 дугаар бажыңның даштынга чедип келирге-ле, эрес-кежээ болгаш арыг силиг улус чурттап турар деп дораан чүве билдиннип кээр. Херим даштында 200 литрниң улуг доскаарларын бок төгеринге таарыштыр кылгаш тургускан, бажың даштын чугайлап,
дозулап чаагайжытканы кайы ырактан көскү.
Бо бажыңның ээзи, ажы-төлүнүң ынак адазы, кады чуртаан өөнүң иштиниң бүзүрелдиг чөлеңгиижи, Олег Намчан ыяш материалдары болгаш демир-дестен бир-ле чүүлдерни кыла кааптар туткан холу шевер, кылган ижи каас-чараш кижилерниң бирээзи.
Тыва чоннуң ыдыктыг кидис өөнүң эт-севи болур өлгүүрге, ширээ ол ышкаш аът баглаажын оон аңгыда, стол, сандай, деспи, эът доораар калбак ыяш, өер ыяш дээш черле кылбас, тутпас чүвези чок.
Ылаңгыя кыжын, Антонина база Олег Намчаннарның чурттап олурар бажыңы хуулгаазын тоол оранынче шилчий бээр. Чеди өңнүг челээш ышкаш, өңгүр-чараш оттар кыпкан Чаа чыл байырлалын уткуп турары ол. Эрес-кежээ болурундан аңгыда, чүгле бодунга эвес, өскелерге база өөрүшкүлүг байырлалды, чараш чүүлдү сөңневишаан
чурттап болур деп чүвени Олег Намчан бодунуң амыдырал-чуртталгазы, үлегер-чижээ-биле бадыткап чоруур.